Vanillumúffur með sítrónukremi

Eru ekki að koma jól? Svo segir dagatalið allavega, þó að hér í Danaveldi sé rigning og 10 gráður og fyrir utan lafandi jólaskraut yfir umferðargötunum er fátt sem minnir Íslendinginn á að sólarhátíðin mikla sé eftir rúmar tvær vikur. Ekki snjókorn í nánd, engin grýlukerti, engar hálfskafnar bílrúður og engir sultardropar úr nös. Þá verður kona að nota fabrikkuð snjókorn til skreytingar á bakstrinum, og fá þannig oggulítinn vetrarfíling í æð.

Naglinn fann Kötlu sítrónudropa aftast í bragðdropasafninu, enda þegar þeir skipta fleiri tugum er ekki skrýtið að nokkrir séu gleymdir og vanræktir. Það var því ráð að nota þá áður en alkahólið nýttist til brugg-gerðar. Úr urðu vanillumúffur með sítrónukremi.
Hreinn og klár ööööönaður gott fólk.

Vanillumúffur

6 stykki

80 g haframjölshveiti (malað haframjöl í matvinnsluvél)

ca 3 msk (15g) NOW möndlumjöl

1,5 skófla (35g) prótínduft vanillu

0,5 dl NOW erythriol

1/3 tsk lyftiduft

1/4 tsk salt

2 eggjahvítur

60 g ósætuð eplamús

60g hreint skyr/grísk jógúrt/kvark

NOW french vanilla dropar

1/4 tsk vanilluduft

0,25 dl vatn

Stilla ofninn á 175°C. Blanda þurrefnunum í skál. Blanda blautefnunum (er það orð?) með töfrasprota í aðra skál. Blanda þurrefnum og blautefnum saman og hella í muffinsform (helst í sílíkon til að þær festist ekki).

Baka í 20 mínútur. Taka út og leyfa að kólna í nokkrar mínútur.