Kotasælusæla

Það spretta tár af hvörmum Naglans þegar fólk dettur í nammipokann af einskærum súrheitum út í hollustuna. Það sorglega er að þessi grey eru í fangelsi eigin ímyndunarafls, þar sem það hímir eins og gína á húsþaki með enn eina ómerkilegu skyrdósina. Einhæfni og þurrelsi í snæðingum bjóða uppgjöfinni upp í dans og súkkulaðið verður líklegt fórnarlamb frústreraðra og hlunnfarinna bragðlauka.

Naglinn er með meirapróf í hollustu-uppskriftagramsi á alheimsvefnum því gagnabanki af gúrmeti er lífsnauðsynlegt til að halda neistanum gangandi og forða frá endurtekinni hrösun ofan í undirheima sukkguðsins.

Einn meðlimur í gagnabankanum er kotasæluís og Naglinn hefur talað um hér. Þessi gleði er algjör öööönaður, og eins og grauturinn góði, býður berrössuð sæla uppá endalausa möguleika með hinum ýmsu bólfélögum í bragðbætingum og kombinasjónum.

Innihald:

150g kotasæla
100 ml vatn
Bragðdropar t.d súkkulaði, berja, karamellu, heslihnetu, vanillu, möndlu, sítrónu, appelsínu…. það sem tungan kallar á þá stundina
Krydd t.d sykurlaust kakó, vanilluduft, kanill, negull, kardemomma… aftur eru endalausir möguleikar
1/4 tsk xanthan gum til þykkingar (frá Bob’s Red Mill, fæst í Kosti)

Aðferð:

Gumsa öllu saman í blandara.

Blanda þar til kurlið er farið úr sælunni og hún orðin eins og barnsrass.

Frysta í 2 klst.

Fyrir einn skammt er best að nota lítinn blandara eða Magic Bullet.

Eða gera marga skammta í venjulegum blandara og eiga í ísskáp, þannig erum við alltaf tilbúin með gómsæta hollustu á kantinum.