Viltu hraðari grunnbrennslu?

Ertu að spóla í hjólförunum í fitutapi? Alveg sama hvað þú borðar lítið og æfir mikið þá er buxnastrengurinn alveg jafn þröngur?

Þú borðar minna og minna. Prófar ketó, plöntumiðað, paleó, lágkolvetna, föstur.

En mörin haggast ekki um gramm.

Eina sem þú ert að tapa er vitglóran og lífsgleðin.

Margir hoppa frá einum kúr til annars og snæða eins og spörfugl allan ársins hring.
Án þess að upplifa neinn árangur.

 

Líkaminn er aðlögunarmaskína og aðlagar sig að kroppuðum horuðum máltíðum með því að hægja á grunnbrennslunni og lullar niður í fyrsta gír til að bregðast við því sem hann telur vera ógn.

Þegar ekki nóg að bíta og brenna fer hann í tímavélina aftur um þúsundir ára og upplifir hungursneyð sem þýðir að nú þarf að spara orkuna.

Líkaminn veit ekki að Hagkaup í Skeifunni er opið allan sólarhringinn.

Eftir langan tíma í hitaeiningaþurrð verður erfiðara og erfiðara að sjá árangur og stöðnunartímabil lengri og tíðari.

Þá eykst hættan á að amínósýrur í vöðvum séu tættar til orkumyndunar sem lækkar grunnbrennslu enn frekar.

Til þess að halda áfram að missa fitu þarftu að sleikja botninn í lífsgæðum hangandi á horriminni. Lífshamingjan fýkur burt eins og haustlauf í norðannepju.

Þú þarft að æfa meira, oftar, harðar til að sjá árangur.

Oftar en ekki leiðir þessar öfgar og óráðsía til meiðsla. Svefnleysis. Meltingatruflana. Örmögnunar. Hormónatruflana. Æfingaleiða.

Fyrir heilbrigða grunnbrennslu er mikilvægt að geta misst fitu á meðan þú treður sem mest af fóðri í maskínuna.

Til þess að snúa við ferlinu og fá grunnbrennsluna aftur upp í fimmta gír að krúsa niður eru nokkrar ráðleggingar.

Taktu fitutapsfrí í nokkrar vikur. Jafnvel mánuði. Bættu smám saman við skammtana í oggulitlum hænuskrefum, einn dag í einu, eina viku í einu. C.a 100-200 kcal á dag. Til dæmis gúlla aðeins fleiri kartöflur í kvöldmatnum. Smyrja aðeins þykkara hnetusmjöri á hrökkbrauðið. Aðeins stærri kjúklingabringu.

Nýttu hitaeiningarnar í að byggja upp vöðva. Því meiri vöðvamassi því meiri hitaeiningabrennsla þegar þú situr og glápir á imbann. Lyftu þungt til að senda rétt skilaboð til líkamans um að þurfa að byggja vöðva og verða sterkari til að höndla hlassið á næstu æfingu. Prófaðu að taka gott preworkout með Beta alanine til að kreista út nokkrar auka endurtekningar.

Fækkaðu þolæfingunum til að hindra vöðvaniðurbrot og að líkaminn þurfi ekki að draga úr vöðvastærð og styrk til að aðlagast of mörgum þolæfingum. Þú vilt líka frekar geta bætt við þolæfingarnar þegar þú ætlar svo að plokka aftur smjerið.

Flikkaðu upp á svefnrútínuna. Svefninn er undirstaðan fyrir harðkjarna átök við járnið, betri ákvarðanir í matarvali, jafnvægi á svengdar og sedduhormónum og djúpa endurheimt í vöðvum og miðtaugakerfi. Prófaðu að taka ZMA eða magnesíum fyrir svefninn.

Pússaðu þolinmæðistaugina því það getur tekið vikur og jafnvel mánuði að endurstilla kerfið. Prófaðu að taka Rhodiola til að róa miðtaugakerfið og halda kortisólinu á réttu róli. Eins getur L-glutamine hjálpað ef þarmaflóran hefur fengið sinn skell af streitu.

Eftir nokkrar vikur geturðu síðan farið að plokka smám saman af matnum aftur og bætt pínulítið í þolæfingar og séð árangur með heilbrigðu og manneskjulegu magni æfinga og haug af gómsætum snæðingum.

Og hverjum finnst ekki gaman að borða nóg og mikið og slefa ekki eins og rolla á girðingastaur í þolæfingum marga daga í viku?

 

 

NOW vörur fást á www.nowfoods.is

Afsláttarkóði: ragganagli20