Vopnahlé

Margar kvinnur heyja Örlygsstaðabardaga við maga, rass og læri, árið út og inn.
Grátklökkar með örfá kálblöð á matardisknum, löngunaraugun mæna á Snikkersið við kassann í matvörubúðinni en mantran í hausnum er kyrjuð: “ þér skuluð meinlætalíf dýrka, sjálfið þarf að vera svekkt og sorgmætt, spikið þarf að leka”

Á sama tíma er húsbandið bullandi hamingjusamt í eigin skinni og snæðir eftir “smag og behag”, eða þar til strengurinn á brókinni þrengist óþægilega mikið inn í kvið.

“Jæja ætli það sé ekki best að taka sig aðeins á” segir hann og parkerar nammipokanum, skiptir rauða kókinu út fyrir dæet varíasjón, og pantar kjúllaborgara á Búllunni með strákunum í lönsj.

Hvað gerist?
Jú, mörin hrynur í bunkum án þess að hann felli eitt einasta tár eða deyi inni í sér úr óhamingju.

Á meðan er eiginkonan að berjast við sentimetrana enn einn mánuðinn en með afar lélegri uppskeru. Í örvæntingu og frústrasjón er sultarbríkin sleikt, ólin í innsta gat, grænn sjeik á kantinum, duft, pillur, ofurfæða gubbast útúr öllum skápum en samt haggast ekki nálin á þessu verkfæri Satans, vigtinni.

“Af hverju er lífið svona ósanngjarnt?” heyrist hrópað úr baðherbergjum úthverfanna.

“Kallkvikindið hrynur niður, á meðan ekkert haggast á skottinu á mér” er grátið á öxlina á vinkonunni yfir grænu tei (það eykur jú brennsluna).

diet-mistakes

“Hver er ástæðan fyrir þessum mannréttindabrotum? Veit Amnesty af þessu?”

Að hluta til má skella skuldinni á hormónabúskap og mun á kynjunum í að halda í lýsið. Vegna barneigna hefur líkami kvenna hærra fituhlutfall og því þrjóskari við fitutapið en skrokkurinn á spöðunum.
En stærsta ástæðan er þetta endalausa hringsól kvenna í smjörtálgun.

Líkaminn vill ekki vera í hitaeiningaþurrð árið út og inn og sé hann þvingaður í þann bransa fer hann í fitutapsverkfall. Hormónabúskapurinn verður miður sín þegar ekki er nóg að bíta og brenna.
Langvarandi hangs á sultarriminni veldur því að líkaminn fer bullandi vörn – Júgi vinstri venjulegur.

Skortur á hitaeiningum í langan tíma er túlkað sem utanaðkomandi ógn og langvarandi hungursneyð og því ríghaldið í spekið.
Skrokkurinn veit ekki að Hagkaup í Skeifunni er opið allan sólarhringinn.

Munið þið eftir Leptín vini okkar? Hann fer í fýlu og frændi hans Ghrelin fær mótþróaþrjóskuröskun.

Það er ástæða fyrir því að fitutap gengur eins og nýsmurð brauðsneið hjá karlmönnum, því þeir borða alla jafna YFIR hitaeiningaþurrði – öfugt við tútturnar sem eru lungað úr árinu sleiktar á horrimina.

 

hollywood

Því vill Naglinn agitera fyrir fyrirbæri sem heitir Fitutapsfrí eða Viðhaldstímabil.
Þá gefum við líkama og haus frí frá öllu sem heitir fitutap í nokkrar vikur – jafnvel mánuði.

Ef þú ert með mörg umfram í skottinu er ráðlegt að taka fitutapið í nokkrum áföngum – 3-4 mánuði í einu- með nokkrum tímabilum af viðhaldskaloríum inn á milli fitutapsmánaða.

Og hvað gerir maður eiginlega í viðhaldi?

Jú við höldum okkur í sömu þyngd eins og nafnið gefur til kynna.
Við aukum hitaeiningarnar úr þurrð (fitutapi) upp í þann fjölda sem þarf til að halda sömu þyngd (viðhald).

Besta nálgunin til að auka við snæðinginn eru hænuskref.
Bæta 10-15% við núverandi kaloríur í hverri viku þar til þú nærð upp í þann fjölda sem líkaminn þarf til að viðhalda sömu þyngd sem er vanalega á bilinu 28-32 x líkamsþyngd í kílóum.

Jamm jamm borða meira… blásið í gasblöðrurnar og hengið upp fánana… nú er gleðin við völd.
Viðhaldstímabil er mjög vanmetið fyrirbæri í fitutapi og alltof fáir sem færa sér það í nyt í leit sinni að betri líkama og langtímaárangri.

Frí frá langvarandi fitutapi og keyra hitaeiningar smám saman upp í viðhaldsfjölda endurræsir hormónakerfið og sendum skilaboð til líkamans að hungursneyðinni sé lokið.
Framtíðartilraunir til lýsisleka verða mun auðveldari því skrokkurinn verður samstarfsfús og kerfið skilvirkt.

Það er þó ekki átt við að setja tærnar upp í loft, verma sófann og troða flatbökum og snúðum í smettið, langt í frá.
Hér skiptir máli að halda sig í hollustunni megnið af tímanum og rífa í járnið af krafti.

Haltu áfram að:
• borða 5-6 smáar máltíðir á dag
• lyfta eins og bestía
• borða prótin í flestum máltíðum dagsins
• mundu eftir góðu fitunni,
• borða grænmeti og ávexti
• veldu flókin kolvetni framyfir þessi unnu snjakahvítu
• leyfa okkur eitthvað gómsætt með reglulegu millibili.

Yfirleitt færist nálin ogguponsu upp en kílóin eru að mestu í formi vökva og glycogens í vöðvum.
Það er því engin ástæða til að fella tár og senda sorgarbréf í Æskuna.
Fleygðu skammtímahugsuninni út í hafsauga og pússaðu langtímagleraugun.

Advertisements