Einfaldasti og fljótlegasti vanilluís í veröldinni takk fyrir tíkall.
Og hann er sykurlaus og horaður.
En líka veganvænn og laktósafrír. En líka glútenfrír og gómsætur.
Ísvélin sem þú keyptir í Sjónvarpsmarkaðnum getur haldið áfram að safna ryki í geymslunni fyrir aftan glósubækurnar úr gaggó.
Því þú þarft ekkert nema klakabox og blandara.
Uppskrift:
2 1/2 dl haframjólk, t.d Minor Figures
1 tsk sjávarsalt
1 msk NOW erythritol
5-8 NOW Better Stevia French vanilla dropar
Hella í klakabox og frysta.
T.d Sistema klakabox sem hægt er að loka.
Skella ísmolunum í blandara og mala mélinu smærra þar til áferðin líkist gómsætum Kjörís.
Toppa gleðina með horaðri kókossúkkulaðisósu
Horuð kókossúkkulaðisósa
2 msk ósætað kakó, t.d Himnesk hollusta
1 avocado
1 dl haframjólk/möndlumjólk/beljumjólk
5-7 dropar kókosdropar, t.d Good Good
2 msk Sykurlaust síróp
Hræra saman með töfrasprota og drizzla sósunni yfir.
Unaður að bera fram með hindberjum og hökkuðum möndlum.
Njóttu með lítilli skeið í algjörri ró og núvitund með öllum skynfærum.
Það má dressa þessa grunnuppskrift upp í allskonar búninga og bæta gúmmulaði útí fyrir aðrar varíasjónir.
- Kakónibbur, sykurlausir súkkulaðibitar, hakkaðar hnetur eða möndlur, piparmintudropar, karamelludropar, sykurlaust kakó, jarðarber, hindber, bananar, hnetusmjör, skyndikaffi.
Þessi færsla er unnin í samstarfi við Icepharma.
Ragga Nagli 