Það kannast allir við þegar bananarnir sem þú keyptir í síðustu viku dangla ennþá í ávaxtaskálinni ósnertir og orðnir vel doppóttir af elli. Sumir orðnir sótsvartir og örvasa gamalmenni. Í stað þess að henda þeim á bál matarsóunar læturðu þá enda lífdaga sína í bezta bananabrauði sólkerfisins. Því eldri og þroskaðri, því betra brauð. Og gómsætið er ekki þessa heims, enda munu verða samdir ljóðabálkar um þetta bananabrauð í framtíðinni.
Bezta bananabrauð norðurhjarans
40g möndlumjöl
40g kókoshnetuhveiti
20g NOW vanilla mysuprótín
2 vel þroskaðir bananar, ca 180 g
1 skorinn banani í þykka bita
65 g hreint skyr (eða Örnu skyr)
0,5 dl grísk jógúrt (t.d Örnu)
2 eggjahvítur
2 tsk lyftiduft
1/2 tsk matarsódi
1 tsk kanill
1 msk NOW erythritol
15 g hakkaðar pekanhnetur
Aðferð:
- stilltu ofninn á 175 °
- Blandaðu öllu (nema pekanhnetunum og sneiddum banana) saman með töfrasprota í þykkt og gómsætt deig
- helltu deiginu í sílíkonbrauðform eða smurt form með kókosolíu (t.d Himnesk hollusta)
- stráðu pekanhnetunum yfir deigið og þrýstu heilum bananabitum ofan í deigið.
- baka í miðjum ofni í c.a 40 mínútur
- leyfðu brauðinu aðeins að kólna en það er best ylvolgt með þykkri ostsneið eða smjörklípu. Eða bara tómt og beint af kúnni.
Þetta brauð slær alltaf í gegn á matreiðslunámskeiðum Röggu Nagla, NOW og Nettó og rýkur út eins og… já eins og heitt bananabrauð.
Ragga Nagli 