Haustmeti með kjeti – svínakinnar

Nú er haustið komið hér í Köben og rigningin grenjar á rúðunni þar sem hver haustlægðin á fætur annarri herjar á Baunann. Þá er tími fyrir huggulegt haustmeti með kjeti eins og í eldhúsinu hennar mömmu í gamla daga.

Í þennan rétt prófuðum við hjónin svínakinnar. Danmörk eru mikið svínaræktunarland og hægt að fá allskonar framandi parta af svíni í matvörubúðunum. Hala, klaufir, hjörtu, lifur og kjálka eða kinnar.

Í þennan rétt má samt vel skipta kinnunum út fyrir lambaskanka eða annað kjöt sem hentar til hægeldunar.

 

Haustmeti með kjeti

500g svínakinnar eða lambaskankar
1 blaðlaukur
3 gulrætur, saxaðar
2 sellerístilkar, saxaðir
salt og pipar
1 msk ólífuolía
1 laukur, saxaður
1 hvítlauksrif, pressað
300 ml vatn + 1 teningur (kjúklinga, lamba)
1 tsk rósmarínkrydd
1 tsk oreganókrydd

 

  1. Kryddið kinnar (eða skanka) með salti og pipar.
    Hita olíu og steikja kjötið á öllum hliðum þar til brúnt allan hringinn.
  2. Steikja blaðlauk, gulrót og sellerí á pönnu í nokkrar mínútur. Bætið við hvítlauk, kjötinu og kryddum saman við og látið malla.
  3. Bætið krafti saman við og látið suðuna koma upp og dúllast í nokkrar mínútur. Setja allt gumsið í steypujárnspott sem þolir hita og látið í 150°c heitan ofn í 1½ klst, eða þar til kjötið er fulleldað.
  4. Berið fram með hrísgrjónum eða kartöflum eða kartöflumús og góðu salati.
    Så lækkert!!
Advertisements