Súkkulaðikaka í bolla

Naglinn er í súkkulaðiham þessa dagana enda súkkulaðigrís mikill.

Fátt gleður sinnið meira en heit súkkulaðikaka. Og þeyttur rjómi á kantinum ætti að vera bundið í stjórnarskrána.

Það er löngu skjalfest að síðasta kvöldmáltíð Naglans verður þriggja rétta dinner af súkkulaðiköku með þeyttum rjóma í öll mál.

En það er víst ekki hægt að gúlla svoleiðis gúmmulaði alla daga án þess að negla of miklu á belginn.
Hvað gera bændur þegar löngunin ætlar holdið lifandi að éta?

Nú þá skellir maður í bráðholla og löglega súkkulaðiköku fyrir eina hræðu.

Tekur aðeins örfáar mínútur svo púkinn þarf ekki að berja lengi á hlustinni.

Púkakvikindinu er algjörlega haldið í skefjum með allskonar gleðilegheitum yfir vikuna og engin ástæða til að detta í sukkið uppúr þurrum þrettánda því sinnið er hamingjusamt.

Naglinn er með “Joey syndrómið” og deilir helst ekki mat. En oftast nær er Naglinn ein í áthamnum og því eru einstaklingsporsjónir af gúmmulaði eins og þessi bollakaka sérstaklega hentugar.