Naglanum finnst prótínsjeikar mjög skemmtilegt át en þeir þurfa að vera þykkari en trélím og snæddir með skeið til að vekja hamingju í hjartanu. Bóndinn er með meira lattelepjandi tungu og vill hafa sínar kombinasjónir drekkanlegar úr glasi. Þar sem hann er stríðalinn og ofdekraður af spúsu sinni í matarmálum er að sjálfsögðu orðið við slíkum óskum.
Um þessar mundir er eftirfarandi kvöldsnæðingur því teygaður af betri helmingnum og vekur gleði hjá bæði þiggjanda og gefanda.
Innihald:
Scitec hvítt súkkulaði 100% whey
1-2 tsk kókossmjör… Naglinn er viss um að á himnum borða þeir kókossmjör í öll mál.
1/4 tsk xanthan gum (fæst í Kosti, frá Bob’s Red Mill)
5-6 dropar Stevia vanilla dropar frá Now (fæst hér) eða Stevia Sweet Leaf (fást í Blómaval)
klaki
150 ml vatn
Aðferðin er gríðarlega flókin. Öllu hent í blandara, blandað á hægum hraða í 1 mínútu. Auka þá hraðann í 30 sekúndur.
Hella í glas og njóta fyrir svefninn eða í millimál.
Markmiðið með kvöldsnæðingi er tvíþætt:
Í fyrsta lagi að hindra niðurbrot á vöðvunum sem við eyddum blóði, svita og tárum að byggja upp.
Í öðru lagi að halda líkamanum í uppbyggingarfasa yfir nóttina til að tryggja áframhaldandi vöðvavöxt. Þeir gera jú við sig í hvíldinni.
Með að troða prótíngjafa í trýnið hækkum við amínósýrumagn í blóðrás sem veitir stöðugt flæði þeirra um musterið okkar meðan slefað er á koddann.
Samhliða prótíngjafa er góða fitan slöfrðu því hún seytir út hormóninu cholecystokinin sem hægir á meltingu.
Þar með tryggjum við að amínósýrur svamla hægt og rólega um skrokkinn alla nóttina og vöðvarnir fá stöðuga næringu.
Ragga Nagli 